Euse Fasnechts-Zettel 2012

Sujet 2012

Metropole Lieschtel ?!

Euch Stedtli-Planer hei mir durchschaut,

Es wird jo fascht überall nur no baut.

S’Ziel isch klar und jetzt chasch es Dir sälber usmohle,

us Lieschtel gits gli e Riese-Metropole.

Gross und Hooch isch jetzt Devise,

Mit viel Glas, Stahl und Yyse.

D’Architekte wärde jetzt grad richtig sauer,

denn mir zeige euch scho die zuekünftige Tower.

Dr Lieschtler Slogan „Alles do, Alles nooch“,

wird g’änderet zue „Alles do, nooch und hoooooooch“.

Du findisch denn alles im glieche Block,

und zwar vom 4. bis zum 99. Stock !

Uf dr 100. Etage gsehsch d’Regierig, die weiche,

wo lachend uf die verstuhnte Lieschtler abeseiche.

Vom 100.ste gohts denn no ä bizzli ufe,

Nur ä paar Stääge, muesch also nid vill schnuufe.

Dört isch ä neui futuristischi Tourischte-Attraktion,

mit ere knapp 10-sekündige Super-Exkursion.

De hocksch in ä Raketeförmige Waage,

und sausisch im ene Sauzahn zum Ussichtsturm abe !

Derfür bliebt in dr Allee aber alles ganz flach,

dört staut mr eifach dr Orisbach.

Au das git ä Super Sach du wirdsch es gseh,

mit dr Rutschi vom Schliefebärg im Affetempo abe in See.

S’beschauliche Lieschtel wei mir bhalte wie’s isch,

so ruumet die futuristische Plän schnäll vom Tisch,

Törli, Thomasturm und Rothuus umzinglet vo Glaspaläscht,

Das gäbt eusem Stedtli total dr Räscht.

S’Letschte Wort hei wie immer mir,

Drum sägis au numme Dir.

Mit em schöne Lieschtel isch bald vorby,

denn die Mega-Tower chömme gli.

Chessel-Rueche Lieschtel